ഇന്ത്യൻ ക്രിക്കറ്റിലെ ഇതിഹാസ താരവും മുൻ നായകനുമായ എംഎസ് ധോണി തന്റെ പ്രിയപ്പെട്ട വിളിപ്പേരായ ‘ക്യാപ്റ്റൻ കൂൾ’ എന്നതിന് ട്രേഡ്മാർക്ക് സ്വന്തമാക്കാൻ അപേക്ഷ നൽകി. ബിസിനസ് രംഗത്ത് തന്റെ വ്യക്തിമുദ്ര പതിപ്പിക്കാനുള്ള ധോണിയുടെ ഈ നീക്കം ഏറെ ശ്രദ്ധ നേടുകയാണ്. അടുത്തിടെ ഇന്റർനാഷണൽ ക്രിക്കറ്റ് കൗൺസിലിന്റെ (ഐസിസി) ഹാൾ ഓഫ് ഫെയിമിൽ ഇടം നേടിയതിന് പിന്നാലെയാണ് ധോണിയുടെ ഈ സുപ്രധാന നീക്കം.

2023 ജൂൺ 5-നാണ് ധോണി ഈ ട്രേഡ്മാർക്കിനായി അപേക്ഷ സമർപ്പിച്ചത്. ട്രേഡ് മാർക്ക് രജിസ്ട്രി പോർട്ടൽ പ്രകാരം, ധോണിയുടെ അപേക്ഷ “സ്വീകരിക്കുകയും പരസ്യം ചെയ്യുകയും” ചെയ്തിട്ടുണ്ട്. ജൂൺ 16, 2025-ന് ഇത് ഔദ്യോഗിക ട്രേഡ്മാർക്ക് ജേണലിൽ പ്രസിദ്ധീകരിക്കുകയും ചെയ്തു. കായിക പരിശീലനം, കായിക സൗകര്യങ്ങൾ ഒരുക്കൽ, കോച്ചിംഗ്, അനുബന്ധ സേവനങ്ങൾ എന്നിവയുൾപ്പെടെയുള്ള വിഭാഗങ്ങളിലാണ് ഈ ട്രേഡ്മാർക്ക് രജിസ്റ്റർ ചെയ്തിട്ടുള്ളത്. ഭാവിയിൽ കായിക അക്കാദമികൾ, ബ്രാൻഡഡ് ഉൽപ്പന്നങ്ങൾ, ഡിജിറ്റൽ സംരംഭങ്ങൾ എന്നിവയുൾപ്പെടെയുള്ള ബിസിനസ്സ് സാധ്യതകൾക്ക് ഈ നീക്കം പ്രയോജനപ്പെടുമെന്നാണ് വിലയിരുത്തൽ.

സമ്മർദ്ദ ഘട്ടങ്ങളിൽ പോലും ശാന്തത കൈവിടാതെ ടീമിനെ നയിക്കുന്ന ശൈലി കാരണമാണ് ധോണിക്ക് ‘ക്യാപ്റ്റൻ കൂൾ’ എന്ന വിളിപ്പേര് ലഭിച്ചത്. 2007-ലെ ടി20 ലോകകപ്പ്, 2011-ലെ ഏകദിന ലോകകപ്പ്, 2013-ലെ ചാമ്പ്യൻസ് ട്രോഫി തുടങ്ങിയ ഐസിസി കിരീടങ്ങൾ ഇന്ത്യക്ക് നേടിക്കൊടുക്കുന്നതിൽ അദ്ദേഹത്തിന്റെ ഈ നേതൃഗുണം നിർണായക പങ്ക് വഹിച്ചിട്ടുണ്ട്.

ട്രേഡ്മാർക്ക് നിയമപ്രകാരം, അപേക്ഷ പ്രസിദ്ധീകരിച്ചതിന് ശേഷം 120 ദിവസത്തിനുള്ളിൽ ആർക്കെങ്കിലും എതിർപ്പുണ്ടെങ്കിൽ അത് ഉന്നയിക്കാം. ഈ കാലയളവിൽ എതിർപ്പുകളൊന്നും ഉയർന്നില്ലെങ്കിൽ ട്രേഡ്മാർക്ക് ധോണിക്ക് ഔദ്യോഗികമായി ലഭിക്കും. നേരത്തെ, ‘പ്രഭ സ്കിൽ സ്പോർട്സ് (OPC) പ്രൈവറ്റ് ലിമിറ്റഡ്’ എന്ന മറ്റൊരു സ്ഥാപനം ഈ വാചകത്തിനായി അപേക്ഷിച്ചിരുന്നെങ്കിലും, അവരുടെ അപേക്ഷയ്ക്ക് നിലവിൽ “തിരുത്തൽ ആവശ്യപ്പെട്ടു” എന്ന സ്റ്റാറ്റസാണ് കാണിക്കുന്നത്.