പ്രശസ്ത ചലച്ചിത്രതാരം മമ്മൂട്ടിയുടെ ഭാര്യാപിതാവും സുൽഫത്തിന്റെ പിതാവുമായ പി.എസ്. അബു (92) അന്തരിച്ചു. വാർദ്ധക്യസഹജമായ അസുഖങ്ങളെത്തുടർന്ന് ഇന്നലെ (2025 ജൂൺ 11, ബുധനാഴ്ച) രാവിലെ ഒമ്പത് മണിയോടെയായിരുന്നു അന്ത്യം.

മട്ടാഞ്ചേരി സ്റ്റാർ ജംഗ്ഷനിലെ പായാട്ട് പറമ്പ് വീട്ടിൽ താമസിച്ചിരുന്ന പി.എസ്. അബു ഏറെ നാളായി ചികിത്സയിലായിരുന്നു. പൊതുപ്രവർത്തന രംഗത്തും സജീവ സാന്നിധ്യമായിരുന്ന അദ്ദേഹം മുൻ സി.ഐ.ടി.യു. വിഭാഗം മലഞ്ചരക്ക് കൺവീനറായും ഇളയകോവിലകം മഹല്ല് മുൻ പ്രസിഡന്റായും പ്രവർത്തിച്ചിട്ടുണ്ട്.

കഴിഞ്ഞദിവസം രാത്രി എട്ട് മണിയോടെ മട്ടാഞ്ചേരി കൊച്ചങ്ങാടി ചെമ്പിട്ടപള്ളി ഖബർസ്ഥാനിൽ കബറടക്കം നടന്നു. പരേതനായ സുലൈമാൻ സാഹിബിന്റെയും ആമിനയുടെയും മകനാണ് പി.എസ്. അബു.

പരേതയായ നബീസയാണ് ഭാര്യ. അസീസ്, സുൽഫത്ത്, റസിയ, സൗജത്ത് എന്നിവർ മക്കളാണ്. മമ്മൂട്ടി (പി.ഐ. മുഹമ്മദ് കുട്ടി), സലീം, സൈനുദ്ദീൻ, ജമീസ് അസീബ് എന്നിവർ മരുമക്കളാണ്. സിനിമാരംഗത്തുനിന്നും പൊതുരംഗത്തുനിന്നും നിരവധി പേർ അദ്ദേഹത്തിന് ആദരാഞ്ജലികൾ അർപ്പിച്ചു.