പ്രധാനമന്ത്രി നരേന്ദ്ര മോദി നാല് ദിവസത്തെ സന്ദർശനത്തിനായി ബ്രസീലിലെത്തി. 17-ാമത് ബ്രിക്സ് ഉച്ചകോടിയിൽ പങ്കെടുക്കുന്നതിനും ബ്രസീലിയയിൽ ഒരു ഉഭയകക്ഷി സന്ദർശനം നടത്തുന്നതിനും വേണ്ടിയാണ് പ്രധാനമന്ത്രിയുടെ ഈ യാത്ര. ആറ് പതിറ്റാണ്ടിനിടെ ബ്രസീലിൽ ഒരു ഇന്ത്യൻ പ്രധാനമന്ത്രി നടത്തുന്ന ആദ്യ ഉഭയകക്ഷി സന്ദർശനമാണിത്.

ശനിയാഴ്ച വൈകുന്നേരം (പ്രാദേശിക സമയം) റിയോ ഡി ജനീറോയിലെ ഗാലിയോ അന്താരാഷ്ട്ര വിമാനത്താവളത്തിലെത്തിയ പ്രധാനമന്ത്രിക്ക് ഊഷ്മളമായ സ്വീകരണം ലഭിച്ചു. ബ്രസീൽ പ്രസിഡന്റ് ലൂയിസ് ഇനാസിയോ ലുല ഡ സിൽവയുടെ ക്ഷണം സ്വീകരിച്ചാണ് മോദിയുടെ ബ്രസീൽ സന്ദർശനം. ഇന്ത്യയും ബ്രസീലും തമ്മിലുള്ള തന്ത്രപരമായ പങ്കാളിത്തം ശക്തിപ്പെടുത്തുന്നതിന് ഈ സന്ദർശനം സഹായകമാകുമെന്നാണ് പ്രതീക്ഷിക്കുന്നത്.

ജൂലൈ 6, 7 തീയതികളിൽ നടക്കുന്ന ബ്രിക്സ് ഉച്ചകോടിയിൽ സമാധാനം, സുരക്ഷ, ബഹുരാഷ്ട്ര സഹകരണം ശക്തിപ്പെടുത്തൽ, നിർമ്മിത ബുദ്ധിയുടെ ഉത്തരവാദിത്തമുള്ള ഉപയോഗം, കാലാവസ്ഥാ പ്രവർത്തനം, ആഗോള ആരോഗ്യം, സാമ്പത്തിക വിഷയങ്ങൾ തുടങ്ങിയ സുപ്രധാന ആഗോള വിഷയങ്ങളെക്കുറിച്ച് പ്രധാനമന്ത്രി സംസാരിക്കും. ബ്രിക്സ് രാജ്യങ്ങൾ വളർന്നുവരുന്ന സമ്പദ്‌വ്യവസ്ഥകൾക്ക് സഹകരണത്തിനുള്ള ഒരു പ്രധാന വേദിയാണെന്ന് പ്രധാനമന്ത്രി ഊന്നിപ്പറഞ്ഞു. “ഗ്ലോബൽ സൗത്ത്” നേരിടുന്ന വെല്ലുവിളികളും ആഗോള സ്ഥാപനങ്ങളിൽ പരിഷ്കാരങ്ങളുടെ ആവശ്യകതയും അദ്ദേഹം എടുത്തുപറഞ്ഞു.

ഉച്ചകോടിക്ക് ശേഷം ബ്രസീലിയയിലേക്ക് പോകുന്ന പ്രധാനമന്ത്രി ലുലയുമായി ഉഭയകക്ഷി ചർച്ചകൾ നടത്തും. വ്യാപാരം, പ്രതിരോധം, ഊർജ്ജം, ബഹിരാകാശ സാങ്കേതികവിദ്യ, കൃഷി, ആരോഗ്യം തുടങ്ങിയ മേഖലകളിൽ സഹകരണം വർദ്ധിപ്പിക്കുന്നതിനാണ് ഈ കൂടിക്കാഴ്ച പ്രാധാന്യം നൽകുന്നത്. കൂടാതെ, ബ്രസീലിലെ ഇന്ത്യൻ സമൂഹവുമായി പ്രധാനമന്ത്രി സംവദിക്കുകയും ചെയ്തു. ഘാന, ട്രിനിഡാഡ് ആൻഡ് ടൊബാഗോ, അർജന്റീന എന്നിവിടങ്ങളിൽ സന്ദർശനം നടത്തിയ ശേഷമാണ് പ്രധാനമന്ത്രി ബ്രസീലിലെത്തിയത്. അഞ്ച് രാജ്യങ്ങളിലേക്കുള്ള എട്ട് ദിവസത്തെ പര്യടനത്തിന്റെ ഭാഗമാണിത്