ഇന്ത്യൻ ശീതളപാനീയ വിപണിയിൽ പെപ്സിക്കും കൊക്കകോളയ്ക്കും ശക്തമായ വെല്ലുവിളിയുയർത്തി റിലയൻസ് ഇൻഡസ്ട്രീസ് തങ്ങളുടെ പ്രശസ്ത ബ്രാൻഡായ കാമ്പ കോളയുടെ വിപണനം നേപ്പാളിലേക്ക് വ്യാപിപ്പിച്ചു. റിലയൻസ് ഇൻഡസ്ട്രീസിൻ്റെ എഫ്.എം.സി.ജി. വിഭാഗമായ റിലയൻസ് കൺസ്യൂമർ പ്രോഡക്ട്സ് ലിമിറ്റഡ് (ആർ.സി.പി.എൽ.) നേപ്പാളിലെ പ്രമുഖ എഫ്.എം.സി.ജി. ഗ്രൂപ്പായ ചൗധരി ഗ്രൂപ്പുമായി (സി.ജി.) സഹകരിച്ചാണ് കാമ്പ ഉൽപ്പന്നങ്ങൾ നേപ്പാളിൽ അവതരിപ്പിച്ചത്.

നേപ്പാളിലെ പ്രശസ്തമായ ‘വൈ വൈ’ ന്യൂഡിൽസ് ബ്രാൻഡിൻ്റെ ഉടമകളായ ചൗധരി ഗ്രൂപ്പ്, ആഗോളതലത്തിൽ 200-ലധികം കമ്പനികളും 260-ലധികം ബ്രാൻഡുകളും കൈകാര്യം ചെയ്യുന്ന ഒരു പ്രമുഖ സ്ഥാപനമാണ്. ഈ പങ്കാളിത്തം കാമ്പ കോളയുടെ അന്താരാഷ്ട്ര വിപണിയിലേക്കുള്ള കടന്നുവരവിൻ്റെ നിർണായക ചുവടുവെയ്പ്പാണ്. നേപ്പാളിന് പുറമെ, യു.എ.ഇ., ഒമാൻ, ഖത്തർ, ബഹ്റൈൻ എന്നിവിടങ്ങളിലും കാമ്പ കോള നിലവിൽ വിതരണം ചെയ്യുന്നുണ്ട്.

1970-കളിലും 80-കളിലും ഇന്ത്യയിലെ മുൻനിര ശീതളപാനീയ ബ്രാൻഡായിരുന്നു കാമ്പ. എന്നാൽ, പെപ്സിയുടെയും കൊക്കകോളയുടെയും കടന്നുവരവോടെ കാമ്പയ്ക്ക് വിപണി വിഹിതം നഷ്ടപ്പെടുകയായിരുന്നു. 2022-ൽ റിലയൻസ് ഈ ബ്രാൻഡ് ഏറ്റെടുക്കുകയും 2023-ൽ പുനരവതരിപ്പിക്കുകയും ചെയ്തു. കാമ്പ കോള, കാമ്പ ലെമൺ, കാമ്പ ഓറഞ്ച്, കാമ്പ എനർജി ഗോൾഡ് ബൂസ്റ്റ്, കാമ്പ എനർജി ബെറി കിക്ക് എന്നിവയാണ് കാമ്പയുടെ നിലവിലെ ഉൽപ്പന്ന നിരയിലുള്ളത്.

ഇന്ത്യൻ ശീതളപാനീയ വ്യവസായത്തിൽ കൊക്കകോളയ്ക്കും പെപ്സിക്കും ശക്തമായൊരു എതിരാളിയായി കാമ്പയെ വളർത്താൻ റിലയൻസ് ശ്രമിച്ചുകൊണ്ടിരിക്കുകയാണ്. നേപ്പാൾ പോലുള്ള അന്താരാഷ്ട്ര വിപണികളിൽ കാര്യമായ സാന്നിധ്യം ഉറപ്പിക്കാനുള്ള തന്ത്രപരമായ നീക്കമാണ് പുതിയ പങ്കാളിത്തത്തിലൂടെ റിലയൻസ് ലക്ഷ്യമിടുന്നത്.