ആഡംബര എസ്‌യുവി പ്രേമികളെ ആവേശം കൊള്ളിച്ചുകൊണ്ട് മെഴ്‌സിഡസ് ബെൻസ് AMG G 63-ന്റെ ‘കളക്ടേഴ്‌സ് എഡിഷൻ’ ഇന്ത്യയിലേക്ക് എത്തുന്നു. ഇന്ത്യയുടെ സമ്പന്നമായ സംസ്കാരത്തിൽ നിന്നും പ്രകൃതിഭംഗിയിൽ നിന്നും പ്രചോദനം ഉൾക്കൊണ്ട് രൂപകൽപ്പന ചെയ്ത ഈ പ്രത്യേക പതിപ്പ് 2025 ജൂൺ 12-ന് പുറത്തിറങ്ങും.

1979-ൽ ആഗോളതലത്തിൽ അരങ്ങേറ്റം കുറിച്ചതുമുതൽ G-ക്ലാസ് അഥവാ G-വാഗൺ ആഡംബര എസ്‌യുവി വിഭാഗത്തിൽ തന്റേതായ സ്ഥാനം ഉറപ്പിച്ചു കഴിഞ്ഞു. പ്രത്യേകിച്ച് ഇന്ത്യയിൽ AMG പതിപ്പിന് വലിയ സ്വീകാര്യതയാണ് ലഭിക്കുന്നത്. G-വാഗൺ ഒരു ലൈഫ്‌സ്‌റ്റൈൽ എസ്‌യുവിയായി മാറിയിരിക്കുന്നു.

മെഴ്‌സിഡസ് ബെൻസ് ഇന്ത്യയും മെഴ്‌സിഡസ് ബെൻസ് റിസർച്ച് ആൻഡ് ഡെവലപ്‌മെന്റ് ഇന്ത്യയും സംയുക്തമായാണ് ‘കളക്ടേഴ്‌സ് എഡിഷൻ’ രൂപകൽപ്പന ചെയ്തത്. ഇത് ഇന്ത്യയുടെ വൈവിധ്യമാർന്ന സംസ്കാരത്തോടുള്ള ആദരവായിട്ടാണ് അവതരിപ്പിക്കുന്നത്. എഞ്ചിൻ ഉൾപ്പെടെയുള്ള സാങ്കേതിക സവിശേഷതകളിൽ സാധാരണ മോഡലുമായി വലിയ വ്യത്യാസങ്ങൾ ഉണ്ടാകില്ലെന്നാണ് പ്രതീക്ഷിക്കുന്നത്. 577 bhp കരുത്തും 850 Nm ടോർക്കും ഉത്പാദിപ്പിക്കുന്ന AMG 4.0 ലിറ്റർ ട്വിൻ-ടർബോ V8 പെട്രോൾ എഞ്ചിൻ തന്നെയായിരിക്കും ഈ പ്രത്യേക പതിപ്പിലും നൽകുക.

മെഴ്‌സിഡസ് ബെൻസ് ഇന്ത്യയിലെയും MBRDI-യിലെയും പ്രമുഖ വ്യക്തികൾ ലോഞ്ച് ഇവന്റ് ഔദ്യോഗികമായി പ്രഖ്യാപിക്കും. ആഢംബരവും പ്രകടനവും ഒരുപോലെ ഇഷ്ടപ്പെടുന്നവരെ ആകർഷിക്കാൻ ഈ പുതിയ പതിപ്പിന് കഴിയുമെന്നാണ് പ്രതീക്ഷ.